 |
LETRAK
Badiostazu
nahiago ditudala
letra borobil eta
tamaina handikoak.
Ez ordea
haietan sekretuak
arinago antzematen direlako,
jadanik sekretuak ere
ebatsi dizkigutelako baizik.
Badiostazu
letra txikian sentitzera
behartu gaituztela,
baina hemen dena egiten da
handi eta borobil,
astun eta sendo.
Sekretuak zelatatzen dizkigute
ondoren kortxozko panelean
zintzilikatzeko.
Aspaldi ahaztua dut
nola sentitzen den letra txikian,
hemen dena sentitzen baita
handi eta borobil,
astun eta sendo.
Halaxe idatziko dizut nik ere,
dakidan era bakarrean,
sekretuak ostu dizkioten
magoaren moduan,
agerian, baldar, babesik gabe.
