 |
||
 |
Paris Sinopsia
Uxue Arzelus Lasa Paris 2017ko Irabazlea
Marikarmen 52 urteko emakume bat da. Postaria da eta bere katu Txuri eta Beltzekin bizi da. Errutinak definitzen ditu bere egunak: goizero iratzargailuak jo baino lehen esnatzen da, katuei jaten ematen die eta lanera joaten da. Etxera iristean telebista piztu eta bere lehiaketa gustukoena jartzen du, sofan eseri eta sudokuak egiten dituen bitartean ikusten duena. Horrela igarotzen ditu egunak Marikarmenek, eta horrela joan zaizkio urteak.
Egun batean, ordea, lanean dabilela, bankuko gutun eta faktura guztien artean atentzioa deituko dion postala ikusiko du. Katu beltz baten marrazkia da, Pariseko helbide bat idatzirik duena. Marikarmenek ezin izango dio tentazioari eutsi eta postala irakurriko du. Mutil batek haren amari idazten dion postala da, haren Pariseko bizitza azaltzen. Marikarmeni mundu berri bat irekiko diote postalek, eta topatu duen interes berri honek haren eguneroko bizitza aldatuko du apurka. Baina errutina batera ohituta zaudenean ez da erraza haustura horretarako lehenengo pausua ematea eta Marikarmen izutu egingo da. Urte luzez eraikitako burbuila horretatik irteteko ausardia topatu beharko du, pausu txikiak emanez bada ere.
1- BARRUAN – MARIKARMENEN ETXEA – GELA – EGUNEZ
Marikarmen (52) bere ohean etzanda dago, zapaira begira. Ohe indibidual bat da, gela ilun batean. Zaharkituta diruditen maindireek gortinekin konbinatzen dute. Pareta loredun paperaz estalita dago. Iratzargailuaren hotsa entzuten da, baina Marikarmenek denbora pixka baten ondoren itzaltzen du. Ohetik jeikitzen da. Beste garai batekoa dirudien kamisoia darama jantzita.
2- BARRUAN – MARIKARMENEN ETXEA – SUKALDEA – EGUNEZ
Marikarmen sukaldeko mahai txiki baten aurrean dago eserita, kafea eta gailetak jaten. Supermerkatuetan oparitu ohi dituzten egutegi horietako bat dauka paretean zintzilik, katu forma duen plastikozko erloju baten ondoan. Hozkailuak, eta gailetek Marikarmenen ahoan egiten duten hotsak dira entzuten diren soinu bakarrak.
3- BARRUAN – MARIKARMENEN ETXEA – EGONGELA – EGUNA
Marikarmenek bi katu laztantzen ditu, maitekiro hitz egiten dien bitartean. Atun lata bat jartzen du lurrean dauden bi katilutan. Katiluetako batean “Txuri” jartzen du, bestean “Beltz”. Katuak jaten hasten dira, bietako bat ere ez da ez txuria ez beltza.
4- KANPOAN – KALEA – EGUNEZ
Marikarmen, “Correos”eko uniformearekin, orgatxo batetik tiraka doa. Atalondo baten aurrean gelditu eta txirrina jotzen du. Zein den esateko aukera eduki gabe atea irekitzen diote, ezer galdetu gabe. Marikarmen orgatxoarekin sartzen da.
5- BARRUAN – MARIKARMENEN ETXEA – ATEA – EGUNEZ
Marikarmen bere etxeko atea irekitzen ari da pareko atetik Belen (43) irteten denean. Apain-apain jantzita doa Belen, saiatu gabe ere dotore doazen pertsona horietako bat da. Haur garraxiak entzuten dira haren atzean.
BELEN
Marikarmen!
Marikarmenek buelta eman eta irribarre egiten dio Beleni.
BELEN
Dena ondo? Gu lanpetuta, beti bezela. Aizu, mesede bat eskatu behar dizut: zazpitan txikiaren antzerki obra daukagu eta... utzi dezakegu Bittor zurekin? Bi ordu baina gutxiago izango dira.
MARIKARMEN
Noski, arazorik ez.
BELEN
Eskerrik asko Marikarmen. Bat zor dizut. Gero joko dizut atea.
MARIKARMEN
Bai, gero arte.
Marikarmen etxera sartzen da eta atea ixten du.
6-BARRUAN – MARIKARMENEN ETXEA – EGONGELA – GAUEZ
Bulldog beltz bat zutik dago sofaren aurrean, arnasa hartzean soinu asko eginez. Marikarmen sofan eserita dago, “sudoku” bat egiten. Telebistan lehiaketa bat entzuten da eta noizean behin Marikarmenek galderei erantzuten die. Txuri eta Beltz haien saskietan daude etzanda. Txakurraren arnas hotsa geroz eta ozenagoa da. Marikarmenek begiratu egiten du.
MARIKARMEN
Sit!
Txakurrak zutik jarraitzen du.
MARIKARMEN
Sit, Bittor, sit!
Txakurra berehala esertzen da. Marikarmenek harro egiten du irribarre. Sudokuarekin jarraitzen du.
7-BARRUAN – MARIKARMENEN ETXEA – GELA – EGUNEZ
Marikarmen bere ohean etzanda dago, zapaira begira. Iratzargailuaren hotsa entzuten da, baina Marikarmenek denbora pixka baten ondoren itzaltzen du. Ohetik jeikitzen da.
8- KANPOAN – KALEA – EGUNEZ
Marikarmenek, bere Correoseko uniformea eta orgatxoarekin, atalondo bateko txirrina jotzen du.
AHOTSA
Bai?
MARIKARMEN
Egun on, postaria na...
Atea ireki diotenaren hotsak mozten du Marikarmen. Orgatxoa hartu eta barrura sartzen da.
9- BARRUAN – POSTALAREN ATALONDOA – EGUNEZ
Marikarmen gutunak sartzen ari da buzoietan “Le chat noir” kabaretaren postala ikusten duenean. Katu beltz baten irudia da, azpian Pariseko helbide bat idatzita duena. Marikarmen begira gelditzen da. Irribarre egiten du postaleko katua behatz batez laztanduz. Postalari buelta ematen dio zeini zuzendua dagoen begiratzeko eta berriro ere irudiari begiratzen dio. Postala irakurtzearen tentazioa eusten ari da Marikarmen. Postala dagokion buzoian sartzera doa, baina lehenago buelta eman eta irakurri egiten du.
POSTALA
Bonjour ama! Ça va? Ni hemen primeran. Goiza café batean eserita igaro dut, egunkaria irakurri eta jendeari begira. Hau bai bizitza! Eta bazkaltzeko Claudinen aitak quiche bat prestatu digu... pufff! Aitaren tortilaren mailan.
Muxu bat!
Aitor
Marikarmenek postalari begira jarraitzen du bizilagun batek haren pentsamenduetatik irtenarazten duenean.
BIZILAGUNA
¡Hola!
MARIKARMEN (lotsatuta)
Hola, buenos días.
Marikarmenek postala buzoian sartzen du urduri eta eskutitzak antolatzen jarraitzen du.
10- BARRUAN – MARIKARMENEN ETXEA – SUKALDEA – GAUEZ
Marikarmen aurrez prestatutako janari pakete bat begiratzen ari da. Tapan zera irakur daiteke: “Quiche lorraine. Listo en 3 minutos”. Sardeska bat hartu eta tapan zulo batzuk egin ondoren mikrouhin labean sartzen du. “Foie gras” irakur daitekeen lata bat ireki eta sukaldetik irteten da.
11- BARRUAN – MARIKARMENEN ETXEA – EGONGELA – GAUEZ
Marikarmenek foie gras lata Txuri eta Beltzen katiluetan banatzen du. Hauek berehala hurbiltzen dira. Marikarmenek telebista piztu eta lehiaketen katea jartzen du. Mikrouhin labearen txirrina entzuten da eta Marikarmen sukaldera doa.
12- BARRUAN – MARIKARMENEN ETXEA – EGONGELA – GAUEZ
Marikarmen sofan eserita dago gurpildun mahaitxo bat haren aurrean duela. Quiche-a jaten ari da eta lehiaketako galderei erantzuten die. Noizean behin ahoa paperezko zapi batekin garbitzen du Marikarmenek, jatetxe dotore batean egongo balitz bezala. Katuek haien katiluak miazkatzen jarraitzen dute.
13- BARRUAN – POSTALAREN ATALONDOA – EGUNEZ
Marikarmenek azkar begiratzen ditu gutunak Pariseko postala aurkitu arte. Oraingo honetan argazkia café batena da, bere terrazarekin. “Café de la Flore” jartzen du argazkiaren behekaldean. Marikarmenek ingurura begiratzen du, bizilagunik ez dagoela ziurtatuz. Postalari buelta eman eta irakurri egiten du.
POSTALA
Salut ama! Gaur Montmartretik ibili naiz paseoan eta bazkalorduan Claudinekin gelditu naiz Café de Floren. Jean Paul Sartre eta Simone de Beauvoir gure ondoan eserita zeudela imajinatzen aritu gara. Ahulki hauek horrenbeste istorio konta ditzakete!
Á la prochaine!
Aitor
Marikarmenek liluratuta begiratzen dio postalari.
14- BARRUAN – MARIKARMENEN ETXEA – SUKALDEA – GAUEZ
Marikarmen sukaldeko mahaiaren aurrean eserita dago, katuetako bat magalean duela. Bestea mahai gainean etzanda dago. Marikarmenek zaharkituta dagoen ordenagailu eramangarri bat du aurrean eta Café de Floreko argazkiak begiratzen ari da. Noizean behin argazkiren bat erakusten die katuei. Simon de Beauvoir jartzen du bilatzailean.
15- BARRUAN – MARIKARMENEN ETXEA – ATEA – EGUNEZ
Marikarmen etxeko atea giltzaz ixten ari da aurreko atea irekitzen denean. Belen irteten da txaketa lotzen ari den bitartean.
BELEN
Marikarmen!
Marikarmenek izu saltotxo bat ematen du.
MARIKARMEN
Egun on Belen. Dena ondo?
BELEN
Bai, beti bezela. Lanpetuta, badakizu. Mesede bat eskatu diezazuket? Asteburuan kanpora goaz, pasako zinake gure PARIS landareak ureztatzera? Ez dute lan asko ematen baina egunero ureztatzen ez baditut ximeldu egiten dira.
MARIKARMEN
Noski, arazorik ez.
BELEN
Mila esker Marikarmen, bat zor dizut.
Marikarmenek atea ixteaz amaitzen du.
MARIKARMEN
Á la prochaine!
BELEN (harriturik)
A la... bai gero arte!
16- KANPOAN – KALEA – EGUNEZ
Marikarmenek ez du atalondora sartzera itxaroten ere postala bilatzeko. Aurkitu eta irakurri egiten du.
POSTALA
Salut ama!
Sorpresa bat daukat zuretzat. Txapel frantses bat erosi dizut! Bixitan zatozenean emango dizut.
Muxu bat!
Aitor
Marikarmen postala irakurtzen ari da bizilagun bat portaletik atera eta harrituta begiratzen dioenean. Marikarmenek atea irekia dagoela aprobetxatzen du barrura sartzeko eta bizilagunari eskertzen dio begirada postaletik kendu gabe.
MARIKARMEN
Merçi beaucoup!
17- KANPOAN – KALEA – EGUNEZ
Marikarmen harro doa kaletik, gaizki jantzi duen txapel frantses bat eta Correoseko uniforme eta orgatxoarekin. Jendea begira gelditzen zaio.
18- BARRUAN – HARATEGIA – EGUNEZ
Txanda aldaketaren txirrina entzuten da. Marikarmen mostradorera hurbiltzen da.
MARIKARMEN
Fillet mignon.
19- BARRUAN – MARIKARMENEN ETXEA – SUKALDEA – GAUEZ
Marikarmen sukaldeko mahaiaren aurrean eserita dago, katuak magalean dituela. Ordenagailuan Pariserako tren billeteak begiratzen ari da. Aldamenean Pariseko hainbat gida ditu. Billetea erosten du. Katuei begiratzen die.
MARIKARMEN (katuei pozarren)
Bidaian goaz!
20- BARRUAN- ARGAZKI DENDA – EGUNEZ
Marikarmen argazki denda bateko ahulkitxoan eserita dago, pareta txuri baten aurrean. Txapela jantzita du eta ilusioz beteriko irribarre bat eskaintzen dio parean duen argazkilariari. Argazkilariak kamara aurpegi aurretik kendu eta txapela seinalatuz keinu bat egiten dio Marikarmeni. Honek, apur bat goibel, txapela kentzen du.
21- KANPOAN – KALEAN – EGUNEZ
Marikarmenek pozik begiratzen dio bere pasaporte berriari.
22- BARRUAN – MARIKARMENEN ETXEA – EGONGELA – GAUEZ
Marikarmen sofan eserita dago txapel frantsesa jarrita duela. Telebistako lehiaketa entzuten da. Marikarmenek liburu bana dauka esku bakoitzean eta txandaka irakurtzen doa. Liburu bat Simone de Beauvoirren “Le Deuxième Sexe” da, eta bestea “Sukaldaritza frantsesa” errezeta liburua.
23- BARRUAN – MARIKARMENEN ETXEA – ATEA – EGUNEZ
Marikarmen bidaia poltsa bat eta katuak eramateko poltsa batekin irteten da etxetik. Ata ixten ari da paretik Belen irteten denean.
BELEN
Marikarmen!
MARIKARMEN
Ezin dut, bidaian noa!
Belenek harriturik begiratzen dio Marikarmenek eskailerak jeisten dituen bitartean.
24- KANPOAN – TREN GELTOKIA – EGUNEZ
Marikarmen tren geltokiko banku batean eserita dago billetea eskuan eta txapela jantzita duela. Izuturik dago. Altxa egiten da. Zalantza egiten du. Eseri egiten da. Billetea begiratzen du. Bertako langile batengana hurbiltzen da.
MARIKARMEN
Barkatu, hemen hartzen al da Pariserako trena?
LANGILEA
Hementxe, bai.
Marikarmen eseri egiten da berriro ere. Ingurura begiratzen du. Haur bat korrika pasatzen da bere aurretik eta bere gurasoengana doa. Aitak besotan hartzen du. Lagun talde bat elkarri bromak egiten dabil bizkarrean daramatzaten motxila handiak ondo estutzen dituzten bitartean. Marikarmen dagoen bankuan bikote bat esertzen da. Besarkatuta daude eta elkarri irribarre egiten diote. Marikarmenek bere bileteari begiratzen dio, goibel. Hautsi egiten du. Bankutik altxa eta billetea eta txapela botatzen ditu zakarrontzira. Geldokitik irteten da.
25- BARRUAN – MARIKARMENEN ETXEA – GELA – EGUNEZ
Marikarmen bere ohean etzanda dago, zapaira begira. Iratzargailuaren hotsa entzuten da, baina Marikarmenek denbora pixka baten ondoren itzaltzen du. Ohetik jeikitzen da.
26- BARRUAN- MARIKARMENEN ETXEA – EGONGELA – GAUEZ
Marikarmen sudoku bat egiten ari da sofan eserita, telebistako lehiaketa entzuten da.
27- KANPOAN – KALEA – EGUNEZ
Marikarmenek ate bateko txirrina jotzen du inongo gogorik gabe.
MARIKARMEN
Postar...
Esateaz amaitu baina lehen atea ireki diotenaren txirrina entzuten da.
28- BARRUAN – POSTALAREN ATALONDOA – EGUNEZ
Marikarmen gutunak buzoietan sartzen ari da. Pariseko postalera iristean begira gelditzen da, atsekabeturik. Buzoian sartzen du irakurri gabe.
29- BARRUAN – MARIKARMENEN ETXEA- EGONGELA – GAUEZ
Marikarmen sofan eserita dago sudokua egiten. Bere ondoan bi katuak eta bizilagunaren txakurra daude eserita. Marikarmenek beti bezala telebistako lehiaketako galderei erantzuten die.
AURKEZLEA
Zein urtetan grabatu zuen haren lehenengo diska The Beatles taldeak?
MARIKARMEN
1962
LEHIAKIDEA
1962
AURKEZLEA
Zuzen! Zein txori da gehien erabili dena meategietako gas kantitatea kalkulatzeko?
MARIKARMEN
Kanarioa
LEHIAKIDEA
Usoa
MARIKARMEN
Ez da zuzena.
AURKEZLEA
Ez da zuzena.
Marikarmenek txakurrari begiratzen dio.
MARIKARMEN (txakurrari)
Kanarioa da.
AURKEZLEA
Adi 2. lehiakidea. Finalera iristear zaude. Galdera hau erabakiorra da. Zure erantzunak baldintzatuko du joko guztia. Horra: zein hiritan ibili zaitezke Luxemburgoko lorategietatik?
MARIKARMEN (burua altxa gabe)
Luxemburgo.
LEHIAKIDEA
Luxemburgo esango nuke nik... enago ziur...
AURKEZLEA
Erantzun bat behar dugu!
MARIKARMEN (inongo gogorik gabe)
Luxemburgo
LEHIAKIDEA
Ondo da. Luxemburgo.
AURKEZLEA
Hori da zure azken erantzuna?
MARIKARMEN
Bai.
LEHIAKIDEA
Bai.
AURKEZLEA
Ez da zuzena!!!! Erantzun zuzena Paris da!!!
Paris hitza entzutean Marikarmenek burua altxatzen du. Pantailara begira gelditzen da, berari hitz egiten ariko balitz bezala. Ez du aurkezleak dioena entzun ere egiten. Programaren amaierako kredituak azaltzen dira pantailan aurkezleak lehiakidea besarkatzen duen bitartean.Marikarmenek tontotuta begiratzen du pantaila, aurpegian irribarre bat marrazten zaion bitartean.
Beltzera
MARIKARMEN (offean)
Bonjour, je m'appelle Marikarmen et je suis très heureux d'être ici.
30- BARRUAN – HIZKUNTZA ESKOLAKO IKASGELA – EGUNEZ
Marikarmen irribarretsu dago. Ikasmahaien aurrean eserita dauden pertsonez inguraturik dago. Paretetan frantsesez idatzitako posterrak daude. Irakaslearen ahotsa entzuten da ikasleei eginbeharrekoak azaltzen.
GELAKIDEA (Marikarmeni)
Utziko didazu borragoma, mesedez? Desastre bat egin dut ariketa honetan.
Marikarmenek borragoma luzatzen dio irribarrez.
FRANTSESEKO IRAKASLEA
Maintenant on va ouvrir le livre à la page 37.
Marikarmenek irribarre egiten du.
