Piztu dinat irratia
 |
| argazkia: Garazi Oihanguren |
(... Eta eguneroko lanetan jarri gaitun gaur ere: esataria entzun, hari ahapeka erantzun, abestu edo hausnarketarako eskaintzen digun gaiari lotu...)
Eman dizkinat hiruzpalau garbialdi labadoran, zuritu ondoren berriz ere bazterrak astintzen jarriko haudalakoan, betiko eginbehar hain errrutinazkoetan . Baina, laugarren garbialdian ere arrastoak atera ditun garbigailutik; izan ere, borra ezinak ditun arrasto batzuk, erraietatik bezala, zapi zurietatik ere, eta hortxe behar diten izan, diren beste zapi zuri guztietatik bereiztu ahal izateko eta urratuak utzi zizkinan horma ertz hura inoiz ez ahanzteko.
(...Herri irratia, trapu zuria eta hirurok, intimoki...)
Badakin, urratu horiexek egiten haute bakan eta hi heu; ganorazko bizipenak ditun azken finean, benetakoak, larruetan eta odol hodietan edo ariman arekatxoa egin arte bizitzen gaituzten geuratasunak.
(...Gai politikoen debatea hasten dun eta arreta handixeagoa behar dinagu...)
Esku artean ferekatu haut nik eta hik hire ukituaz gozatu ni, tira! Ez zakinat fereka zunan edo...
Aurreko hilabetean trapu zahar bat besterik ez hintzen, kotoizko kamixeta baten arrastoa, heu ere. Eta orain ez haiz hintzena, eraldatu egin dun hire izaera. Gurekin ere horixe gertatu dun izaten hasi gindunanetik honainoko bilakaeran
(...Irrati honi eta komunikatzeko moduari ere, antzera...).
Eta orain haiz hautsak kentzeko zapi zuririk ederrena, urratu eta guzti.
Edo urratu guzti horiengatik.
...sintonia..
