Berotzen du lurra agertzen delarik
eta hozten haren eza dugularik.

Goizeko txoriaren kantuak alaitzen dizkidalarik
belarriak
lagunen erantzuna datorkit haizean,
txistuka batzutan
bestetan isil hotz.

Goizeko ihintzaz bustitzen zaizkidalarik
oinetakoak
blaitzen naiz gorputz-arimaz
familiako oroitzapen goxoekin.
Suaren gisa erretzen naiz harri hotzaren gainean
bihotzeko zauriek zizta egiten didatelarik
goizero bizirik nagoela jakinarazteko.

EGUZKIA.
Toki guztietan dago,
agertu edo ez agertu.
Bero edo hotz.
MAITASUNA.

Maitasunak dena hartzen du
amodioak sortu
eta ezetatik
olerkiak sortzen ditut.