Saiatu ziren
Irudia: Lina Bo Bardi
Ama, saiatu dira
nire birjinitateak ez ditu bost kontinente zeharkatzen
eta nire gorputz hauxe, berau,
ez da ezeren gose.
Ama, saiatu dira
nire maitale guzien zerrenda deiturak emendatzen
eta nire begiek hauxe, berau,
ez dute berant arte ikusi baino.
Ama, saiatu dira
nire pasioaren koordenada laikoak zuritzen
eta nire eskuok hauxe, berau,
ez naizela nigan sinesdun besterik diotelako.
Ama, saiatu dira 
nire aurpegiaren zozoa argiztatzen
eta nire masailek hauxe, berau,
ondoen dakite neure algararen inozoa.
Ama, saiatu dira
nire bizkarreko galtzailea zamapetzen
eta nire sahietsezurrek hauxe, berau,
aspaldi utzi diodalako alferrik kexatzeari, arnasten dut.
Ama, saiatu dira
nire oinen ederra laudatzen
eta neure azkazalek hauxe, berau,
ez dudala ohiturarik kimatzeko, denborak gomuta hartuta.
Ama, saiatu dira
neure garunaren paradigma eta lokuzioak ulertzen
eta neure ileak, hauxe, berau,
oroit nazatela gorroto nahi dudan moduan, ez bestela.
Ama, saiatu dira
eta egia da,
pasioa, ez besterik, zor diot lehen aldiari.
Azkenean, garaiz heldu zitzaidan askatasuna.
