 |
 |
Enaren arteran
Ez naiz sukaldaririk onena
baina lau-bost bat plater goxo egiten ditut
-neure estiloan-
inork inoiz egingo ez dituen bezala.
Ez naiz zortzi mila metroko
mendi ibiltaria
baina badakit gure mendietara igotzen
-neure estiloan-
enara beltzen artera
eta hiru-lau bat tontorretan
Marik eta Eatek agurtu naute
euren leinukoa bainintzan.
Ez naiz irakurlerik itsuena
baina bi- hiru bat idazle ezagutu ditut
-neure estiloan-
esanetan eta izanetan.
Ez naiz idazlerik emankorrena
baina liburutxo batean islatu dut
-neure estiloan-
naizenetik apur bat.
Eta horregatik guztiagatik ere
ez naiz egundoko emakumea, baina
-neure estiloan-
emakumerik ederrena naiz
zure beso artean.
