Bart
Irudia: Lina Bo Bardi
Atzo zamalkatu ninduen emakumeak ez daki
neure bularrak orain,
harriz inguratutako irla goseti baten antza dutela.
Ez daki atzo zamalkatu ninduela ni,
nahiz eta begiak itxita edukitzen dituen
zango-korapilo ikaratiak izan sabelean.
Emakumeak baleki
zer ahaztu nuen bere ohantzean,
nik utzitako hutsune hotzituan,
hain juxtu ere, jakingo luke
tximeletak edaten nabilela orain,
itsasertzeko tabernatxo honen atrezzoan,
eta musika merkea dela, 
geure gau urbanoa apaintzeko.
Zamalkatu ninduen emakumeak
atzo zerbait utzi zidan idatzita
eta azala gorritu zaion turista honek,
ez daki,
-eskuak, bihotzak, tximeletak-
urtzen diren gauzekin zer egin,
zer egin atzokoekin
eta gaur igandea delako,
berak ez daki,
atzo dela gaur
eta neure bularrak harriz inguratutako
irla goseti baten antza dutela,
urrutitik.
